給聽日放榜的你，過來人作小小分享
每年放榜前，我都會緊張，讀緊書嘅我固然緊張淆底心神恍惚，但脫離放榜後，每次聽到「放榜」我個心都不其然咁淆咗一淆，因為放榜真係一件好恐怖嘅事，特別係對我呢啲成績唔上唔落嘅考生，因為差嘅已經可以Who fucking care咁面對聽日放榜，成績好嘅大可以Plan定點樣慶祝盡情今晚世界盃狂歡。
我對上一年放榜都已經係四年前，而且仲係AL，而唔係DSE。
可能你會問，咁你分享嘜春？
由於我重讀過，亦都自修過，當中經歷都可以分享比一啲預左要重讀/自修嘅人睇，可以參考下咁。
第一，自修條路係一件非常痛苦，十級地獄嘅一條路黎，我可以話比你知個事實係 " 十個人自修，九個都係失敗" ，但往往當日選擇自修嘅人都會眼殘無視呢啲所謂嘅事實，亦都堅定不屈咁表明自己唔會成為自修底下嘅失敗者，亦都拎一啲萬中無一嘅成功例子去說服人地同說服自己，有時我想講人地背後嘅辛酸痛苦回憶，你會唔會做得到?
所以選擇自修要考慮好多因素，睇下自己成績究竟係差幾遠， 差少少 or 差某一科嘅話，絕對有條件可以自修。但如果差太多，而且超過二至三科嘅話，都係另謀出路。
第二就係份決心，自修係長久戰，當你選擇依條路時侯，你嘅仗就定咗係下年先打，依一年你問心會唔會Keep到團火Keep足一年?
如果我同你講:「你一星期後就會死。」我相信依一星期內你會好好珍惜所有，盡情做自己想做嘅事，仲可以放棄訓覺時間。
但如果我同你講:「你一個月後就會死。」我相信依一個月內你亦會好好珍惜所有，盡情做自己想做嘅事，但係會訓覺。
但如果我同你講:「你一年後就會死。」我相信頭幾個星期你會好珍惜每一分每一秒，但唔洗一個月後就會好似唔記得咗你得返一年命，亦都唔會咁Chur自己，之後到咗死前一星期你就知淆底，就會後悔無用盡自己所有時間。
自修嗰一年，你睇住身邊嘅朋友各散東西，有人去升讀大學，有人升讀Asso/HD，有人返舊校重讀，有人出黎做野，而你同佢地最大分別就係人地有朋友，而你係無!你每日起身，就係溫書，溫到夜晚你先可以抖下，可能你會打下機，但每當你打一鋪機，你內心罪惡感就會倍增，久而久之，有人叫你食飯唱K你都開始唔想去，亦都唔想見人。
因為你會覺得自己低人一等，眼見身邊朋友Facebook貼哂啲玩O camp嘅相，社交圈子擴大，你內心只有葡萄，亦都唔敢再開Facebook。當你繼續溫書時侯，你內心愈讀愈想爆粗，呢堆書讀咗幾年，依家又要面對，悶嘅程度令你好想放棄或者好想即刻考DSE，但你唔得，你點都要等多一年。
自修好聽嘅都叫做學生，唔好聽嘅仲衰過啲失業人士，人地失業都起碼知自己係失業，目標好簡單，就係搵工。但自修就係四不象，失業又唔係，失學又唔係，好似駐米大虫咁，每一日承受家人同親戚嘅壓力同咀臉，一個新年都囉你命，你直頭唔想拜年!
每晚訓覺你都唔會安樂，有時會夢到放榜情景，又會問自己" 如果再衰多一年，咁點算好？" ，呢堆問題都夠玩死你，每一日自修都係精神上嘅折磨，通常自修多幾個月就會頹，溫書變左例行公事，去補習都係補完就算，唔會返屋企睇返啲筆記，之後到考前幾日就會淆底，最後放棄。
上面只係講咗少部份自修上嘅痛苦，自問你可以有決心可以面對上面所有經歷嘅話先好自修，如果唔係就會出事。
同埋自修記得要知道自己第一年衰咩，勇於面對錯誤，重點改善，目標放大啲，唔好LV2->LV3，而係LV2->LV5!!
其實我個人黎講係鐘意自修多過重讀，小弟去過現X書院重讀過，但讀書氣氛好差，個個都係口說要升大學，身體就狂玩狂浦嘅人，而且師資好差，唔好以為補習名師教返你，哂氣喇! 好多時會阻礙咗左你讀書，而且學費係好屮貴，所以自制能力好嘅人 我寧願你自修+補習就最好。
睇到呢度，可能會話"都唔關我事，我自問考得唔錯!"
如果你咁掉意輕心就錯了，正所謂驕兵必敗，唔好以為放榜完就唔洗煩，真正大佬就係" Jupas "，你識得玩 Jupas，低分都可以讀大學，你唔識玩嘅話，高分都隨時無得讀大學!每年都有好多高分考生無得讀大學，最大原因就係佢地唔識排 Jupas，亂咁排以致排錯哂。所以 Jupas隨時玩死人。
Jupas係一個鬥"收風"鬥"資訊"嘅考試，你需要掌握所有收生準則，內部收生準則，每年教師都會傳遞嘅大學各系收生機密(收集哂所有上年考生所有公開試成績嘅一個Data)，當然喇，上述堆野好難先有，我都唔會比到你，但當你收風時侯，都要小心有大量人士擾敵，話邊科邊科收得高，邊科邊科垃圾，其實佢地就係揀咗個科唔想你地揀，廢時搶佢地位!
當年我唔鐘意讀Asso/HD係因為太貴，1年四萬，兩年八萬，讀完可能無用，我亦都覺得自己無本事可以經ASSO升到大學，加上我成績差某一科，所以我先選擇自修，亦都成為左我人生最低潮最黑暗嘅一年。
我每年都遇過一班雙眼有火嘅人去自修，真正成功嘅幾乎接近 "零"。自修唔係比人去逃避，個代價係好大，自修前一定要三思。
排Jupas都要三思，唔好咁大野心同心頭高，你記住最大目的就係有大學讀!如果條件許可，先好博一博，如果唔係最好穩穩陣陣。
同埋依家好多人其實都唔知自己想點，亦都唔知自己可以讀咩科，到最後求求其其揀啲科黎讀Hea住先，最後得不償失。
其實放榜都係驚一晚，之後回望睇返其實放榜無咩咁可怕
最可怕嘅係你唔知道自己條路點行，因為會驚足一世。
今晚除左睇世界盃外，亦都好好諗下自己將來，好好諗下自己想點。從來無諗過嘅人亦都好好反省一下係咪放榜前先至諗呢啲野呢?
祝各位聽日考到好成績!
(以上為個人意見，參考好喇)
Search